كل يوم اخرج اوراقى و ابدأ فى الكتابه و فى نهاية اليوم اجد ما فى الورق هو مجرد شخابيط
Wednesday, April 21, 2010
التاريخ قال كلمته
وقف التاريخ يسجل الاحداث و الانجازات واحد له ف الطب معجزات او واحد له مخترعات او واحد عشان وطنه مات وغيرهم وغيرهم واقفين طابور من كل المستويات.
شفت الطابور سألت : عشان ايه اللمه يا جدعان فقالوا : دا طابور الانجازات فقلت : هوهو .. دا انا انجازاتى ما تتنسى و سجلى منها منتلى فوقفت ف الطابور و قلت : اتفرجى عليا يا دنيا و اتعلمى.
و جه عليا الدور بص التاريخ ليا و قال : انت مين ؟ اسمك مش فى سجلاتى اطلع م الطابور يا حزين و اقف مع المتفرجين قولتلوا : انا المصرى ازاى متعرفنيش دا انا منقوش على الجبين و اسأل عليا اى حد م البنى ادمين فقاللى التاريخ : طب قول يمكن اعرف انت جاى مع مين ---------------------------------------- قلتله : انا ... انا فرعونى العالم كله يعرفونى و عشان اثارى بيمجدونى و تاريخى عمره 5000 عام استحاله يعرفوا ينسونى.
انا بانى السد العالى ف الفن و الهندسه مثالى كان فكره ف خيالى و بقى واقع بجهدى و دمى و مالى
و انا عل الجبهه فدائى و العالم كله يعرف ندائى بلدى افديها بدمائى و ف اكتوبر النصر كان اهدائى -------------------------------------------- التاريخ بصلى و قال انا سألتك انت مين مش اجدادك مين انا عارف جدودك المصريين العالم كله اتعلم منهم علم و دين لكن دلوقتى العالم كله بيبص و يقول دولا المصريين ف اخر الطوابير مستنيين و ورا الستاير متدارين ستارة جهل او ستارة فقر و شويه ورا ستارة دين. انتوا فين من العقاد و طه حسين انتوا فين من احمس و مينا موحد القطرين. انت فين من كل ده يا حزين. انت فين من اعظم حضاره على مر السنين. كل همك ازاى تنزل وسط البنطلون شويه حلوين. و ازاى تعمل شعرك سبايكى بجل و فازلين. دا انت خيبتك بقت قويه من سنين.
دا انت امى و عيوبك حنت ضهرى و اخطائك زودت مواجعى. تاريخك ... صفر اسمك ... صفر. فهمك بدائى حتى وجودك عشوائى. بقيت علتى و دائى بعد ما كنت بعلمك دوائى. دا انت صلاحيتك انتهت من سنين -------------------------------------------- وقفت مدهوش مش قادر انطق و وطيت وشى ف الارض زى ما اكون ملعون و جرٌيت رجلى و خرجت من الطابور بعد ما كنت بليت البنطلون
مشكووووووووور
ReplyDeletehttp://www.alsadiqa.com